Ни күрһәм дә — үҙ еремдә,
Миктәһәм, кәрәкһәм дә...
Буранбай Исҡужин

Ир-егеттәр төйәк итә тыуған ерен,
Ә мал-тыуар төйәк итә туйған ерен. —
Башҡорт һарҡындыһы менән тулған Себер,
Халыҡ, тиеп, әсенмәйҙер береһе-бер.

Бар милләт эләгеп-ҡолап ил бөтәйтә,
Был истәктәр «аҡса» тиеп бил бөксәйтә.
Ә беҙ белеп торабыҙ бит: байтағығыҙ
«Үлергә» тип атайсалға ҡайтаһығыҙ.

Тик халыҡҡа, тыуған ергә, йә, әйтегеҙ,
Кәрәк булырмы һуң тере мәйетегеҙ?!
...Йөрөй бирегеҙ, оҡшағас Себерегеҙ.
...Тик бығаулы һөлдә тапһағыҙ берегеҙ,
Алып ҡайтығыҙ... ул — бәлки, Буранбайҙыр*.

* Буранбай Ҡотосов — башҡорт халҡының легендар батыры, Себерҙә һөргөндә үлгән.