Башҡортостан юлдаш телевидиниеһы хаҡындағы ҡыҙыу дискуссияларға айҙан ашыу ваҡыт үтте. Бер нимә лә үҙгәрмәне тиерлек. БДБҠ, БЙИ, Күк бүреләр үҙҙәренең сәйәси уйындарынан бушамай. Башҡорт йәмәғәтселеге был ваҡиғаларға битараф ҡалды. БСТ-ла башҡортса тапшырыуҙарҙың һаны бары тик фонд иҫәбенә генә артты. Әгәр ҙә ул элекке етәксе заманында төшөрөлгән программаларҙы күрһәтеп кенә ултыра икән, тимәк, үҙенең көсһөҙлөгөн иҫбатлай. Тимәк, элекке коллектив яҡшыраҡ эшләгән булып сыға! Ә ҡайҙа Гүзәл Ибраһимова вәғәҙә иткән модернизация? Башҡортса бер генә яңы проект та юҡ. Уның ҡарауы рус телендә Весы тип аталған ябығыу (!) темаһына арналған ҙур проект эфирға сыға башланы. Яңы программаларҙың юҡлығы ябай сәбәп менән аңлатыла: генераль директор үҙен тәнҡитләгән коллектив менән эшләргә теләмәй, ә башҡорт журналистарын табыуы еңел түгел. Йәштәрҙе иһә өйрәтергә, үҫтерергә кәрәк. Дикторҙар, тәжрибәле журналистар эштән ебәрелһә, йәштәр менән кем эшләр һуң?

Журналистар менән генераль директорға ярашырға һәм артабан эшләргә ҡушылғайны. Директор иһә ярашырға теләмәй һәм быны асыҡтан-асыҡ белдерә. Тиҫтәләгән йылдар дауамында матур итеп эшләп килгән, телевидение эшен яҡшы белгән хеҙмәткәрҙәр ҡапыл профнепригодныйға әйләнгәнме ни? Береһенә - акт, икенсеһенә объяснительная һ.б. Әлбиттә, был акттар, увольнениелар - хеҙмәткәрҙәрҙең, журналистарҙың хоҡуҡтарын боҙоу.

Былар - коллективтың эске проблемалары тиеүселәр яңылыша. Журналистар бит үҙҙәренең мәнфәғәттәре өсөн түгел, башҡорт тамашасыһы, башҡорт халҡы исеменән сығыш яһаны. Түҙеп, шымып ҡына ятһалар, был көнгә лә ҡалмаҫтар ине. Башҡорт тамашасыһының, башҡа милләт тамашасыһы кеүек үк үҙ телендә телетапшырыуҙар ҡарарға хаҡуғы бар! Журналистар ошоно иҫбат итергә маташты, иҫбат итте. Ләкин үҙҙәрен арыҫлан менән бер ситлектә артабан йәшәргә ҡалдырҙылар. Ҡарап ҡарайыҡ, кем кемде еңер, тиергә теләнеләрме? Беҙҙең илдә бит власть кемдең ҡулында, дөрөҫлөк тә шуның яғында.

БСТ журналистарының хаты һәм уның эҙемтәләре башҡорт йәмәғәтселеге өсөн бер һынау булды. Үҙебеҙ үҫтергән, махсус факультет асып, уҡытҡан ул һәм ҡыҙҙарыбыҙҙы эҙәрлекләүҙән һаҡлай һәм яҡлай алабыҙмы? Юҡ, яҡлай алмайбыҙ булып сыҡты. Башҡорт тамашасыһының мәнфәғәтен уйлап, үҙ телебеҙҙә тапшырыуҙар талап итә алабыҙмы? Юҡ. Битараф булмаһаҡ та, шымып ҡалыуы хәйерлерәк. Әүҙем йәштәрҙең ваҡыты юҡ: улар йә асыға, йә митингка йыйыла. Ә зыялылар, халыҡ, атҡаҙанған исемдәрен йөрөтөүселәр ситтән генә күҙәтеүсе ролен һайланы. Һуң, халыҡ өсөн янып-көймәгәс, ниңә был исемдәрҙе күтәреп йөрөтәһегеҙ һуң һеҙ? Биш йыл һайын ҡабатланып торған юбилейҙарҙы телевизорҙан күрһәтергә кәрәк бит, бәлки, эш шундалыр? Гүзәл Рамазан ҡыҙы Ситдиҡова, Баныу Ҡаһарманова, Азат Бердиндың фекерҙәрен башҡалар ҙа дәррәү күтәреп алһа, Башфорум ҡулланыусыларының хаты адресатына барып етһә, бәлки, һөҙөмтә икенсе төрлөрәк булыр ине. Һүҙ журналистарҙың эшһеҙ ҡалыу ҡурҡынысы тураһында ғына бармай. Ошо һәм башҡа проблемаларға ҡағылышлы дискуссиялар, мөрәжәғәттәр, сығыштар гражданлыҡ активлығын арттырыр, демократия дәресе булыр ине. Битарафлыҡтан арынырға, хоҡуҡтарыбыҙҙы белергә һәм талап итә башларға ваҡыттыр.

Ә беҙҙең зыялыларыбыҙ 90-сы йылдар һынауын үткән кешеләр бит. Башҡорт мәктәптәре, кафедралар, гәзит-журналдар, милли ойошмалар асыу мәлдәрен хәтерләйһегеҙме? Матбуғатта ниндәй ҡыҙыу мәҡәләләр донья күрә торғайны. Былар барыһы ла беҙҙең ҡаҙаныштарыбыҙ. Тик шуныһы: ҡасандыр яулап алынған был еңеүҙәр ҙә бөгөн юҡҡа сыға бара. Гәзит-журналдарҙың тиражы әҙәм көлкөһө. Башҡорт теле уҡытыусыларының иртәгә бөтөнләй кәрәкмәүе лә ихтимал. Йәштәр эшһеҙлектән деградацияға дусар. Проблемалар БИХИСАП! Миҫал өсөн президент блогына кем генә яҙмай. Тик башҡорттоң проблемалары ғына юҡ унда. БСТ-ла башҡортса тапшырыуҙарҙың кәмеүе, журналистарҙы эҙәрлекләү бер сигнал ғына ул. Ошо мәлдә үҙ һүҙебеҙҙе әйтеп ҡалырға кәрәк.

Был ваҡиғалар беҙҙең тарҡаулыҡты күрһәтте. Был ваҡиғалар башҡорт йәмәғәтселегенә диагноз булды. Артабан беҙҙе ишетерҙәрме һуң?