Тотош республикабыҙ халҡы, донъяның төрлө мөйөштәрендә йәшәгән милләттәштәребеҙ 10-11 июндә баш ҡалабыҙ Ѳфөлә үтәсәк III Бөтә донъя башҡорттары ҡоролтайына әҙерлек солғанышында йәшәй. Минең аңлауымса, был мөһим сараның төп әһәмиәте—халҡыбыҙҙы борсоған мәсьәләләрҙе уртаға һалып һөйләшеү, белемде һәм мәҙәниәтте күтәреү, телде үҫтереү, ситтә йәшәгән милләттәштәр менән бәйләнеш булдырыу.

Минеңсә, башҡорттоң бөгөнгө хәле бик үк шәптән түгел. Республикала беҙ һан яғынан икенсе урында торабыҙ. Әммә быға шөкөр ҡылып ҡына ултырыуҙан фәтүә юҡ. Заманында ата-бабаларыбыҙ ерен, халҡын, телен һаҡлау өсөн күп көрәшкән, ҡан ҡойған. Үкенескә күрә, башҡорт халҡы бөгөн дә «баҫҡынсы»ларҙан азат түгел. Улар—эскелек, битарафлыҡ, телдән һәм милләттән оялыу. Ошолай йәшәү халҡыбыҙҙы ваҡлай, милләттең киләсәген оло ҡурҡыныс аҫтына ҡуя.

Халҡыбыҙҙың аяныслы хәлен үҙгәртер өсөн беҙгә күп эштәр эшләйһе бар. Әлбиттә, әгәр бөтәһе лә быны аңлаһа, бер-береһенә ярҙамға килергә әҙер торһа, башҡорт халҡы был кәртәләрҙе йырып сығыр, тип ышанам. Беҙ һан яғынан аҙ булһаҡ та, рухи яҡтан көслө булырға тейешбеҙ. Тап рух ныҡлығы беҙҙе башҡалар араһында оло итәсәк. Әгәр ҙә һәр бер башҡорт үҙ тарихын һанлаһа, мәҙәниәтен яратһа, милләте өсөн янып йәшәһә, киләсәгебеҙ ышаныслы, яҡты буласаҡ.

Әлбиттә, ҡоро һүҙҙәр менән генә эш ҡыйратып булмай. Телен онотоп барған ҡала балалары хәүеф уята. Әсә теленә һөйөү ғаиләнән башланыуын һәр кем яҡшы аңларға тейеш. Бөгөнгө башҡорт балалары республикабыҙ менән идара итерлек киң ҡарашлы, белемле, рухлы, милләте һәм теле өсөн янып йәшәрлек шәхестәр булып үҫһен тиһәк, ғаилә тәрбиәһенә иғтибарҙы көсәйтергә тейешбеҙ. Йәш быуын халҡыбыҙҙың тарихын белергә, уның менән ғорурланырға тейеш. Бер кем дә туған телендә һөйләшеүҙән, уҡыуҙан оялмаһын. Был төшөнсәләр ҙә ғаиләлә, мәктәптә тәрбиәләнә.

Интеллект, рухи байлыҡ, айыҡ аң—милләтте һаҡлап ҡалыуҙың төп ҡоралдары. Боронғолар белеп әйткән: рух һүнмәһә—ил үлмәҫ. Башҡорттарға элек-электән әҙәплелек, тыйнаҡлыҡ хас булған, тик был күндәм булыуҙы аңлатмаһын ине. Халҡыбыҙ ғәрсел дә, яусыл да булған бит. Ошо ҡиммәтле сифаттарыбыҙҙы юғалтмаһаҡ ине.

Атайсал