10 һәм 11 июндә III Бөтә донъя башҡорттары Ҡоролтайы сиктәрендә Өфөлә башҡорт йәштәренең Беренсе Ҡоролтайы үтәсәк.

Башҡортостан Республикаһы Йәштәр сәйәсәте, спорт һәм туризм министрлығы, «Бөтә донъя башҡортары Ҡоролтайы» ижтимағи ойошмалар халыҡ-ара союзы башҡарма комитетының Йәштәр советы тарафынан ойошторолған ҙур сарала Рәсәйҙең төрлө төбәктәренең ижтимағи ойошмаларынан 600-ләп активист ҡатнашасаҡ.

Йәштәр съезының программаһы буйынса 10 июндә ҡала буйлап сәйәхәт ҡылынасаҡ, Салауат Юлаев һәйкәленә сәскәләр һалыу церемонияһы һәм митинг ойоштороласаҡ. Кискеһен делегаттарҙы башҡорт эстрадаһы йондоҙҙары ҡатнашлығында «Башҡорт халҡына хат» концерт программаһы көтә.11 июндә Конгресс-холл бинаһында башҡорт йәштәре беренсе Ҡоролтайының пленар ултырышы үтәсәк. Сарала республика етәкселәренең, министрлыҡ һәм идаралыҡ етәкселәренең, Башҡортостан һәм Рәсәйҙең башҡа төбәктәренән йәштәр ижтимағи ойошмалары вәкилдәренең ҡатнашыуы планлаштырылған.

Форум һөҙөмтәләре буйынса резолюция һәм башҡорт йәштәренә мөрәжәғәт һүҙе ҡабул ителәсәк.

Йәштәр Ҡоролтайын ойоштороусылар фекернсә, был сара йәштәрҙең тәжрибә менән уртаҡлашыуына һәм Рәсәй үҫешенең көнүҙәк һорауҙарын хәл итергә булышлыҡ итәсәк.

Сараларҙа ҡатнашыу өсөн 7 июндән 9 июнгә тиклем Өфө ҡалаһы, Ленин урамы, 10 адресы буйынса, 27-се кабинетҡа мөрәжәғәт итергә мөмкин. Сара барған урындарҙа булыр өсөн теркәлеү үтеү мотлаҡ. Белешмәләр өсөн телефон: 276-45-87 һәм журналистар өсөн: 251-16-32.