Агросәнәғәт комплексы бөгөн, белеүебеҙсә, еңел булмаған осор кисерә. Тармаҡты яңы кимәлгә күтәреү, ауыл хужалығы производствоһын һаҙлыҡтан сығарыу, баҙарҙы үҙебеҙҙә етештерелгән сифатлы һәм арзан продукция менән тәьмин итеү илдә иң актуаль проблемаларҙың береһенә әүерелде. Был ауыр хәлдән сығыу, агросәнәғәтте күтәреү маҡсатында “АПК-ны үҫтереү” милли проекты ғәмәлгә ашырыла, Рәсәй ауыл хужалығы банкыһы үҙенең селтәрен киңәйтә, дәүләт кимәлендә субсидиялар, льготалы кредиттар биреү мәсьәләһе даими контролдә тотола. Әммә был ғына аҙ – ауыл хужалығы аяҡҡа баҫып китә алмай. Етмәһә, һуңғы йылдарҙағы ҡаты ҡоролоҡтар крәҫтиәндең тамам бәкәленә һуҡты – был хәлде тағы ла киҫкенләштерҙе. Тимәк, комплекстағы эште яйға һалыуҙың берҙән-бер юлы – инвестициялар йәлеп итеү. Әммә инвесторҙарҙы ерҙе ҡуртымға биреү ваҡытын оҙайтҡанда ғына йәлеп итергә мөмкин. Тик шул саҡта ғына эре эшҡыуарҙар ауыл хужалығы производствоһына инвестициялар һалыу тураһында ҡыҙыҡһыныр ине. Был фекерҙе БР Президенты Р.З. Хәмитов күптән түгел үткән кәңәшмәлә лә әйткәйне.

16 декабрҙә муниципаль район хакимиәтенең конференц-залында үткән кәңәшмәлә тап ошо хаҡта һүҙ барҙы. Унда БР ауыл хужалығы министры А.С. Йыһаншин, муниципаль район хакимиәте башлығы Р.Р. Сәйетов, “СИТНО” компанияһының (Магнитогорск ҡалаһы) генераль директоры П.А. Журавский, ауыл хужалығы идаралығы, милекселек менән идара итеү комитеты, башҡа ведомстволар етәкселәре һәм белгестәре ҡатнашты. Кәңәшмәлә район биләмәһендә “СИТНО” маркаһы аҫтында агрохолдинг компанияһы төҙөү мөмкинлеге тикшерелде.

– ”СИТНО” – ҡеүәтле компания, – тип билдәләне үҙенең сығышында Азат Салауат улы. –Уның генераль директорын тап һеҙҙең районға һөйләшергә килергә шәхсән үҙем саҡырҙым. Маҡсатыбыҙ – ауыл хужалығына инвестициялар йәлеп итеү, уны һаҙлыҡтан сығарыу. Бындай мөмкинлекте ҡулдан ысҡындырырға ярамай.

– Районда агросәнәғәт комплексын үҫтереү өсөн яҡшы потенциал бар, – тине Рөстәм Рафаэль улы, – ауыл хужалығы тәғәйенләнешендәге ерҙәр майҙаны, мал, ҡош-ҡорт һаны буйынса район республикала иң тәүге урындарҙың береһен биләй. Әле бөтә төр хужалыҡтарҙа 52 мең баш һыйыр малы, 10 меңдән ашыу йылҡы аҫрала. Тимәк, ауыл хужалығы продукцияһын эшкәртеү өсөн тейешле база бар.

Баймаҡ халҡы “СИТНО” компанияһының продукцияһы менән яҡшы таныш. Ул юғары сифатлы булыуы менән айырылып тора. Компанияла 8,5 мең кеше эшләй. “СИТНО”ға Силәбе өлкәһендәге ҡеүәтле икмәк бешереү комбинаты, ҡошсолоҡ комплексы, аҙыҡ-түлек сәнәғәте предприятиелары, шулай уҡ Башҡортостанда 120 мең гектар ере булған, үҫешкән эре ауыл хужалығы производстволары инә. Етештерелгән продукцияның 78 проценты бар Рәсәй буйынса таралған “СИТНО” магазиндары аша һатыла. Генераль директор билдәләүенсә, компания Мәскәүҙә ҡош итен һыуытылған көйө һатыуҙы ла ойошторған, бының өсөн рефрижераторҙар паркы бар. Компанияның килеме 18 млрд һум тәшкил итә.

Ғөмүмән, кәңәшмәлә билдәләнеүенсә, бындай капиталға эйә булған компания районда ауыл хужалығы производствоһын үҫтереүгә яңы импульс бирә алыр ине. Һөйләшеүҙә шулай уҡ Сибай элеваторы проблемаһы ла күтәрелде. Министрҙың фекеренсә, был предприятие ла инвестицияға мохтаж – шунһыҙ уның киләсәге юҡ.

Әле компания белгестәре райондың инвестиция йәлеп итеү мөмкинлектәрен өйрәнә һәм шунан һуң ғына аныҡ ҡарар ҡабул итәсәк. Был проект үҙен аҡлармы – уныһын ваҡыт күрһәтер.

Һаҡмар